Aste honetan DBH1eko eta DBH2ko ikasleek bi idazleren bisita izan dute Etika ikasgaiaren barruan. Amets Arzallus hendaiarraren “Miñan” liburua irakurri dute DBH2koek, eta Kattalin Miner hernaniarraren “Moio” DBH1ekoek. Astelehenean Arzallus eta martitzenean Miner, izan zuten, bai, ikastolako ikasleek zeren gainean berba egin egile biokin.
Miñan
Ibrahima Balderekin batera idatzi du “Miñan” Amets Arzallusek. Irungo Harrera Sarean migranteei laguntza ematen ziharduela ezagutu zuen Arzallusek Ibrahima eta estutzen joan zen harreman hartatik sortu zen liburua. Ibrahima Baldek bere jaioterritik, Ginea Konakrytik, Irunera iritsi arteko bide luze, latz eta bortitza zelan egin zuen kontatu zion ahoz eta paperera ekarri zuen Ametsek. “Anaia txikia” esan gura du “Miñan”-ek pular hizkutzan. Izan ere, Ibrahimaren bidaia, bere anaia txikiaren bila eginiko bidaia izan baitzen. Gazte zein helduentzat irakurketa beneta gomendagarria da Miñan.
Zelan ezagutu zenuen Ibrahima eta noiz pentsatu zenuen istorio hori liburu bihurtzea?
Ibrahima ezagutu nuen Irungo Harrera Sarean, konkretuki, tren geltokia. Hurbildu nintzaion esanez boluntario talde bat bazela, informazioa eta laguntza emateko prest, eta berak esan zidan bi egun zeramatzala Irunen eta ezagutzen zuela Harrera Sarea. Nahi banuen lagunduko zidala beste migranteengana hurbiltzen, errazagoa izango zela bera tarteko bazen. Eta horrelaxe, lehenengo egunetik neu laguntza eskaintzera joan eta berak lagundu zidan niri.
“Miñan” bat dago egunero Irunera iristen diren migratzaile bakoizteraen atzean?
Askoren atzean bai badago familia oso bat, haurride gazteagoak edo gurasoak, edo laguntza behar duen sare oso bat. Min sakon bat sarritan, behar handi bat, bizitza hobe baten ilusioa… Arrazoi asko daude migrante horien atzean eta, askotan, tragedia handi bat ere, kontatzeko ez dena batere erreza.
Garrantzitsua iruditzen zaizu liburuari eta gaiari buruz gaztetxoekin hitz egitea? Zelan hartzen dute beraiek?
Bai. Garrantzitsua da eskoletan migrazioaren gaia lantzea eta ahotsak eta lekukotasunak entzutea gai horretaz diskurtso bat edo iritzi propio bat eraiki ahal izateko. Hezkuntza programetan gai hau txertatzea berebizikoa da.
Zer bide egiten ari da liburua?
Euskeraz bide luze eta zabala egiten ari da. Italieraz, alemanez eta ingelesez argitaratu berri da. Udazkenean gazteleraz eta katalanez argitaratuko da. Eta galegoz hurrengo urtean. Danieraz ere ateratzekotan da. Ikusiko beste hizkuntzetan ze harrera izango duen baina saiatuko gara kausa eta mezu honen alde burrukatzen, beti ere euskeratik abiatuz.
Moio
“Moio” Aimar Elosegi Ansa hernaniarraren goitizena zen, 2007an bere buruaz beste egin zuen gazte transexuala. Hamabi urte beranduago, Aimarren bizitza eta heriotzaren erretratua eta, bide batez, gure gizartearen transfobia agerian uzte duen liburua osatu zuen Kattalin Minerrek.
Nor zen Moio?
Aimar Elosegi Ansa transfobiagatik bere buruaz beste egin zuen hernaniko gazte bat zen. Nahiz eta bere inguruaren babesa eta ulermena izan, transexualitatea zer den ulertzen ez duen gizarte honi egin behar zion aurre. Bere historian gizarte honetako bi tabu handi batzen dira, gainera: transexualitatea eta suizidioa. Zoritxarrez badago bien arteko korrelazio ilun bat, transfobiak eragina. Hori guztiori plazara ateratzeko asmo bat ere badago liburu honen atzean.
Garrantzitsua deritzozu liburuari eta gaiari buruz gaztetxoekin hitz egitea?
Gazteekin liburua lantzea bazen nire nere helburetako bat, gaiari heltzeko tresna bat edukitzea. Egia esan, gozada bat da. Errespetuz irakurtzen dute eta, eskoletara joatea tokatzen zaidanean, sentitzen dut begirune hori. Eta ikusten dut helduekin alderatuta, akaso, ezagutza handiagoa transexulitaeari, edo LGTBI kolektiboari dagokionez. Kontzientziatuago daudela esango nuke, nahiz eta betiko jarrerak hor dauden gazteen artean ere. Ederra da duten enpatiarako eta elkartasunerako gaitasuna. Uste dut bere liburuak bere funtzioak betetzen dituela eta horrek asebetetzen nau.
