24 otsaila, 2015

Derrigorrezko Bigarren Hezkuntza

Konpetentzietan oinarritutako hezkuntza

DBHn Konpetentzietan oinarritutako hezkuntza bideratzeko, Ikastolen Elkarteak sortutako EKI proiektuko ikasmaterial berritzailea aukeratu dugu. Euskal Curriculuma garatzen du, konpetentzietan oinarrituta eta integrazioaren pedagogiaren bitartez. Dagoeneko, DBHko ikasmaila guztietan ezarrita dago elkarren osagarri diren bi euskarritan, paperean eta digitalean. Azken honek, konpetentzia digitalak (testu editoreak, ekuazio editoreak, mapa digitalak, audio/bideo grabazioak…) funtsezko zeregina du oinarrizko konpetentzien lorpenean.


Ikas-arloekin lotutako konpetentziez gain, bost dira Euskal Curriculumaren eta EKI proiektuaren hezkuntza-eredu berriaren bereizgarri nagusiak. Ikaslearen irteera-profilean oinarritutako curriculuma jartzen du helburu gisa, eta horretarako oinarrizko konpetentziak hartzen ditu “ipar eta gailur” modura. Bizitzarako ezinbestekoak diren eta bizitzako egoera guztietarako baliagarriak diren konpetentzia orokorrak edo metadiziplinarrak zehazten ditu, oinarrizko hezkuntza osoko irteera-profilaren giltzarri gisa. Honako hauek dira oinarrizko gaitasun horiek: Ikasten eta pentsatzen ikasi; Komunikatzen ikasi; Elkarbizitzen ikasi; Norbera izaten ikasi; Egiten eta ekiten ikasi. Berauek ebaluatzeko irizpideak zehaztea da gure lehen erronka.

EKI proiektuaren barruan sei alor jorratzen dira, nagusiki: Euskara eta Literatura; Lengua Castellana y Literatura; English; Matematika; Gizarte Zientziak; Naturaren Zientziak.
Gure bigarren erronka beste irakasgaiak, (Gorputz Hezkuntza, Teknologia, Plastika…) ere eredu konpetentzialera ekartzea litzateke, horretarako unitateen konpetentzia,  egitura,  egoera eta ebaluazio irizpideak zehaztuz, eta beste gaiekin uztartuz.

IKKI

Ikasketa kooperatiboa lan talde txikien erabilera didaktikoan oinarritzen da.
Talde hauetan ikasleek elkarrekin lan egiten dute, modu kooperatiboan, norberaren eta taldearen maila gorena lortzeko asmoz.
Edukiak eta konpetentziak lantzeaz gain, elkartasuna eta elkarrekiko errespetua ere lantzen dira, “egitura” deituriko teknika desberdinak erabiliz.

Eleanitz

1990ean sorturiko Ikastolen proiektu propioa da.
Etapa guztietan jarraitzen dugun proiektua izanik, ikasleak DBHko 3.mailan, Gizarte zientziak ikasgaia ingelesez lantzeko gai dira.
Bestalde, frantsesa, DBH osoan, lau urtez beraz, aukerako ikasgai moduan landu daitekeen laugarren hizkuntza da.
Eleanitz proiektuaren helburua DBH amaitutakoan, Kurutziagako ikasleek ingelesez B1 maila lortzea eta frantsesez A2 maila lortzeko prestatuak egotea litzateke.

Antzerkia

Euskal Herrian, antzerkia curriculumean integratuta duen ikastetxe bakarra gara. DBH-2. Mailako ikasleek hartzen dute parte bereziki. Ahozkotasuna lantzeko tresna aproposa da, talde bizipen ezberdinak bideratzen ditu, hezkidetzarako oso lagungarria da…
Proiektu honetan 3 arlo daude inplikatuta: Musika: dantza eta gorputz adierazpena; Plastika: eszenografia eta jantziak; Dramatizazioa: ahozko eta gorputz adierazpena, rol aldaketak ….
Urtean zehar prestatutako antzerkia maiatzaren amaieran taularatzen da San Agustin aretoan.