Sarritan egin izan dugun bezala, oraingoan ere Guraso.eus atarira jo dugu post interesgarri baten bila. Gaztetxoek eskolara daroatzaten motxilen pisuaz dihardute Julen Muruamendiaraz kiropraktiko bergararrarekin. Hemen artikulua:
Kontuz eskolako motxilen pisuarekin!
Irailak, uda bukaera dakarren bezala, eskoletako kurtso hasiera ere badakar, eta, hasiera horrekin, material guztiaren prestaketa. Liburuak, batetik; agenda, bestetik; koadernoak… Eta motxila? Hau ere beharrezkoa da, eta garrantzi handikoa, gainera.
Guraso askok ardura handia izaten dute zer-nolako motxila erosi. Beste batzuek, ordea, ez diote behar adina arretarik jartzen kontu honi.
Julen Muruamendiaraz kiropraktiko bergararrak ohartarazten du haurren motxilek geroz eta pisu handiagoa izaten dutela, eta, horregatik, geroz eta gehiago direla bizkarreko arazoak edo minak pairatzen dituzten haurrak.
“Zenbakiek argi islatzen dute arazoaren garrantzia; izan ere, 1996. urteaz geroztik Espainiako Estatuan %330 hazi da bizkarrezurreko arazoak dituzten haurren kopurua. Euskal Herriko datu zehatzik ez daukat. Motxila astunek eta horien erabilera txarrak gazteen eta haurren bizkarreko arazoetan eragiten dute. Pisu handia eramateak dakartzan arazo esanguratsuenak izaten dira kontrakturak, postura txarrak, lepoko, sorbaldetako eta bizkarreko arazo muskularrak, eta eskoliosia. Denboraz konponbiderik aurkitzen ez bada, haur horiek nagusitan bizkarreko min kronikoak izan ditzakete”.
Motxilaren pisua
Haur baten motxilaren pisuak ez luke haur horren pisuaren %10-15 gainditu beharko. Adibidez, haurrak 30 kilo pisatzen badu, motxilak ez luke 3-4,5 kilo baino gehiago pisatu beharko. Garrantzi handiko kontua da; izan ere, azken ikerketa batek jasotzen duenez, haurrek beraien pisuaren %30 baino pisu handiagoa duten motxilak eramaten dituzte, gutxienez, astean behin.
Muruamendiarazen esanetan lehen begiratuan antzeman daiteke noiz daraman pisu handiegia. Motxilak umearen postura aurrera inklinatzera behartzen badu, argi dago pisu handiegia daramala.
Gurpildun motxilak ere ez dira soluzioa. Berez, gurpildun motxilek motxila normalek baino gehiago pisatzen dute, eta horiek gehiago betetzeko joera dugu. Gainera, eskolako eskailerak igotzeko haurrek esku batekin hartu behar dituzte, eta horrek gorputza alde batera okertzera behartzen du.
Gomendio garrantzitsuak
.Saiatu haurrarentzat neurri egokia duen motxila aukeratzen, eta tirante zabalekoa.
. Ahal dela, bizkarrera itsatsita joan dadila motxila, eta izan ditzala tirante bigungarriak.
. Motxilaren mugimendua saihesteko, joan dadila bizkarrera ondo lotuta, eta beti bi sorbalden gainean; sekula ere ez sorbalda bakarraren gainean.
. Beharrezkoak diren gauzak bakarrik eraman behar dira motxilan. Ez litzateke badaezpadakoendako lekurik egon beharko. Benetan beharrezkoa direnak soilik sartu behar dira motxilan.
. Motxila barruko antolamenduak ere berebiziko garrantzia du. Pisu handieneko liburuak bizkarretik gertu eraman behar dira eta pisu txikiagokoak, aldenduago.
. Saiatu, baita ere, motxila jartzerakoan zein kentzerakoan mugimendu zakarrak ekiditen.
. Gurpildun motxilaren alde egin badugu, izan dadila motxilaren garaiera haurrarenari egokitua. Eta aurrean eraman bultzaka, eta sekula ere ez atzean narrasean.
. Motxila jasotzerakoan haurrak flexionatu ditzala belaunak pisua hanken gainean kargatzeko, eta ez bizkarrean.
Haziera garaiaren arriskuak
Gogoan eduki behar dugu 12-14 urteen artean gertatzen dela gizakiaren garapen fisiko handiena. Hala, adin horietan bizkarrezurra hazten dago. Bizkarrezurrean 100 hazkunde-kartilago baino gehiago daude, eta, hazkunde fisikoa orekatua izan dadin, horien guztien garapenak aldi berekoa izan beharko luke.
Zoritxarrez, oharkabeko postura aldaketek eta ohitura txarrek bizkarreko mina dakarte denborarekin, eta baliteke orduan zuzentzeko beranduegi izatea. Hori gerta ez dadin, oso garrantzitsua da hazkunde adinean dauden haurrei bizkarrezurreko aldizkako azterketak egitea. Kiropraktikak, esaterako, haurren eta nerabeen osasun prebentzio integrala eta naturala eskaintzen du.
Haurrek aukera dezatela motxilaren kolorea edo gaia – superheroia, futbol talde bat, adarbakarra, panpina…–, baina helduek aukeratu behar ditugu motxilaren gainerako aldagaiak. Eta lasai geratu umearen bizkarrerako eta osasunerako ona den motxilaren hautuarekin.
Artikuluaren iturria: Puntua aldizkariaren 206. zenbakia.
Egilea: Julen Muruamendiaraz
